La finamira dalla Musica giuvenila Lumnezia ei da dar la pusseivladad als musicants giuvens d’emprender da sunar in instrument da stuors e cunzun era da star enqual ura da cumpignia.

Avon 25 onns ha Robert Casanova giu la grondius’idea da fundar ina musica giuvenila en Lumnezia. Sinaquei ei el semess ensemen cun tut ils dirigents dallas musicas dil vitg dall’entira vallada. Igl 1. da zercladur 1990 ei la Musica giuvenila Lumnezia vegnida fundada entras Robert Casanova, Norbert Capeder, Simon Derungs, Clemens Riedi e Pieder Alig. Cuort temps suenter dumbrava la musica gia 60 musicantas e musicants.

La suprastonza da gliez temps, ei stada fetg premurada da tschentar ensemen in program da musica variont per saver mantener la collegialitad denter ils musicants. Quei ei reussiu fetg bein ad els. Cun render pli attractiv la musica entras l’organisaziun da differents viadis ni spassegiadas,  sco era cun fin d’jamnas da camp, han els carmalau beinenqual musicant.

Nus havein uonn era fatg in viadi culs commembers e cun las commembras. Quei viadi ha menau nus el Tessin.

Dapi treis onns ei la fin d’jamna da camp a Vignogn in element fix da nies plan d’exercezis e quella ha mintgamai liug igl october. La fin d’jamna da camp spitgein nus adina cun grond entusiassem e gronda motivaziun.

Ultra da quei ha la Musica giuvenila Lumnezia priu part a differentas fiastas da musica. 1994 alla Fiasta da musica cantunala a Glaruna, 1995 alla Fiasta da musica districtuala a Val s. Pieder, 2009 alla Fiasta da musica cantunala a Domat ed il 2016 vegnin nus a prender part alla Fiasta da musica cantunala a Lai. Il pli grond success ha la musica festivau igl onn 2006 alla Fiasta da musica federala a Lucerna, nua che nus essan daventai campiuns svizzers ella categoria da brass dalla 4. classa.

Igl onn 2000 havein nus registrau in disc cumpact cun tocs da marschar ed igl onn 2001 havein lu era retschiert ina nova mondura. 2010 ei vegniu festivau il giubileum da 20 onns a Vignogn ensemen cun la Musica giuvenila Jenaz e la Gruppa da tamburs Lumnezia.

Duront quels 25 onns existenza dumbrava la musica mintgamai denter 40 e 65 musicantas e musicants.

Ei fa a nus grond plascher d’era uonn puspei astgar far musica cun 42 musicantas e musicants ed aschia crear ina relaziun legreivla denter in e scadin.